Almusal

Habang nagdodota ako kanina(2:30am), bigla akong nakaramdam ng gutom. Naisipan kong mag browse ng mga blog tungkol sa mga almusal. Ang sasarap! Naalala ko tuloy yung iba't-ibang almusal na nakain ko na simula pa noong bata ako.

Lugaw, Champorado w/ keso bits, pandesal w/ palaman, pandesal w/out palaman, sinangag at tuyo, sinangag at adobo, sinangag at fried chicken, sinangag at longganisa, sinangag at hotdog, sinangag at pritong itlog, hamburger, cereals... Marami pang iba.

Pero ang tatlong paborito ko ay ang mga sumusunod:

1. Champorado w/ keso bits

2. pandesal w/ palaman

3. sinangag at tuyo / sinangag at longganisa

Champorado w/ keso bits. Nagsimula akong mahilig sa ganitong almusal noong grade 1 pa lang ako. Madali kasi kainin ang champorado. Madali rin itong gawin. Ready-to-make ito at lalagyan mo lang ng kaunting asukal at gatas. Bago ako gisingin ni mama, nakahanda ang champorado sa hapg-kainan. Lalagyan ko na lang ng asukal at gatas. Hindi ko na masyadong maalala kung bakit naisipan kong lagyan ng keso ang champorado. Basta ang alam ko, maraming keso dito sa bahay noong mga panahon na iyon. Kauuwi lang kasi nila mama at papa galing Saudi noon at marami silang uwi na keso, honey, at kung anu-ano pa. At ayun nga. Sa sobrang tamad ko ata na ipalaman ang keso sa tinapay, binutil butil ko ang keso at hinalo sa mangkok kasama ang champorado. Nasarapan naman ako. At doon nagsimula ang champorado w/ keso bits.

Pandesal w/ palaman. Masarap ang pandesal lalo na kung bago at mainit. Masarap ito kung may palaman. Pero masarap rin kahit wala. May palaman man o wala, kapag isinawsaw sa mainit na kape, hhhmm.. sarap!

Sinangag at tuyo / Sinangag at longganisa. Ito na siguro ang pinaka paboritong almusal ng mga pinoy. Dagdagan mo pa ng pritong itlog at kamatis. Samahan mo pa ng sawsawan na suka. Ang sarap! Mas masarap itong kainin habang nagkakamay at nakataas ang isang paa sa upuan.

Ginutom tuloy lalo ako. 4am na. Ano kaya maalmusal mamaya?